Sot është bërë varrimi i të riut 16-vjeçar, Aulon Zeka i cili u vra një ditë më parë në Prishtinë.

Ndërkohë Indeksonline mëson se pikërisht në orët e mbrëmjes janë arrestuar dy persona lidhur me rastin.

Zëdhënësi i Policisë për Rajonin e Prishtinës, Agron Borovci ka konfirmuar për Indeksonline se është bërë arrestimi i një mashkulli dhe një femre.

“Në orët e mbrëmjes ndaj dy personave është shqiptuar masa e arrestit policor, të cilët me rekomandimin e Prokurorit të Shtetit janë dërguar në Qendrën e Mbajtjes për 48 orë për t’i proceduar më tej fazat tjera të procesit hetimor” ,ka thënë Borovci.

Sipas Borovcit, dy të dyshuarit e arrestuar janë të mitur.

“Dy të arrestuar, një femër dhe një mashkull që të dy të mitur, Policia po zhvillon hetimet lidhur me dyshimet e ngritura nëse të njëjtit ndërlidhen në ndonjë forme me rastin në fjalë”, ka përfunduar Borovci.

Ndryshe gjatë ditës së sotme Indeksonline ka raportuar se i dyshuari për vrasjen e të riut 16 vjeçar është Guxim Hadri i cili nuk jeton në shtetin e Kosovës.

Po ashtu gjithnjë sipas burimeve të Indeksonline, motivet e vrasjes së Aulon Zekës kishin të bënin me një lidhje dashurie.